ಡಿಸೆಂಬರ್ 17, 2012

ನೀ ಬಿಟ್ಟು ಹೋಗಿದ್ದು..!

ಬಿಗಿದು ಹಿಡಿದ ಶರ್ಟಿನ ಕಾಲರು
ಬದುಕಿನ ಗುಡುಗಿಗೆ ಬೆದರಿ ನಿನ್ನೆದೆಗಿಟ್ಟ ಮುಖ
ಕಿವಿ ನಿಮಿರಿಸಿದ ನಿನ್ನೆದೆ ಬಡಿತದ ಸದ್ದು
ಅರೆಗಳಿಗೆ ತಲ್ಲಣಿಸಿದ ಬಿಸಿಯುಸಿರು

ಕಿರುಬೆರಳಿಡಿದು ಪಯಣಿಸಿದ ಆ ತೀರ
ಪಿಸುಮಾತಲ್ಲಿ ನಾಚಿದ ಕೆನ್ನೆಗೆಂಪು
ಮರಳ ಮೇಲೆ ಗೀಚಿದ ಜೋಡಿಹೆಸರು
ಕುರುಬಿ ಮುಳುಗಿದ ಆ ಸೂರ್ಯ

ನೀನೇ ಒತ್ತಿದ ಹಣೆಯ ಕುಂಕುಮ
ಸ್ಪರ್ಶಕ್ಕೆ ಬೆದರಿ ಹಿಂದಡಿಯಿಟ್ಟ ಕಾಲ್ಬೆರಳು
ಕಾಲುಂಗುರ ತೊಡಿಸಿದ ನಿನ್ನೊಲುಮೆ
ಏಳು ಹೆಜ್ಜೆಗೆ ಜೊತೆಯಾದ ಗೆಜ್ಜೆ

ನಿನ್ನೊಂದಿಗೆ ಕೊನೆಯಾದ ಕನಸುಗಳು
ಯಾರೋ ನೀನಿಲ್ಲವೆಂದು ನಿನ್ನದೆನ್ನುವ
ಎಲ್ಲವನ್ನು ನನ್ನಿಂದ ಕಿತ್ತಿದ್ದು
ಚಿತೆಯ ಉರಿಯಲ್ಲಿ ಬೆಂದಿದ್ದು

ಅರೆಬೆಂದ ಕನಸುಗಳು
ಹಗಲಿರುಳೆನ್ನದೆ ನನ್ನ ಕಾಡಿದ್ದು
ನನ್ನಪಾಲಿಗೆ ನೀ ಬಿಟ್ಟು ಹೋಗಿದ್ದು
ಮರೆತೆನೆಂದರೆ ಮರೆಯಲಾಗದ
ಈ ನೆನಪುಗಳನ್ನು..!




ಡಿಸೆಂಬರ್ 7, 2012

ಹನಿ ಹನಿ ಇಬ್ಬನಿ..

1. ಅಂದು
ಗೆಜ್ಜೆ ಸದ್ದಿನ ದಾರೀಲಿ
ಹೆಜ್ಜೆ ಇಟ್ಟು ಬಂದವನು
ಇಂದು
ಸಪ್ತಪದಿಯ ಹೆಜ್ಜೆಗೆ 
ಗೆಜ್ಜೆಯ ಸದ್ದಾದ...! 


 2. ಅಕ್ಷರಗಳನ್ನೆಲ್ಲ
ಹನಿಯಾಗಿಸುತ್ತಿದ್ದವಳು
ಇಂದೇಕೋ
ತನ್ನ ಕಣ್ಣ ಹನಿಗಳ ಮುಂದೆ
ಮೌನಿಯಾಗಿದ್ದಾಳೆ.

3. ಕೊತಕೊತ ಕುದಿವ
ಒಡಲ ನೆತ್ತರಿಗೆ
ಒಂದು ತೊಟ್ಟು
ನಿನ್ನ ಪ್ರೇಮ ಜಲ ನೀಡು
ಇಂಗಿ ಬಿಡಲಿ
ಅದರ ಪ್ರೇಮದಾಹ..!


4. ಮನಸು ಮತ್ತು ಕನಸು
ಎರಡು ಒಂದೇ ಎಂಬ
ನನ್ನ ಮೊಂಡು ವಾದಕ್ಕೆ
ಕಾರಣ

ಎರಡರಲ್ಲೂ ನೀನೇ ಇರುವುದು..


5. ಚಳಿಯೆಂದು
ಮುದುಡಬೇಡ
ನನ್ನ ಕನಸುಗಳ
ಸುಟ್ಟದರೂ ನೀ
ಬೆಚ್ಚಗಿರು...!

6. ಸಂತಸದ ಚಿಲುಮೆಗೆ
ಈ ಮಳೆಯೇ ಆಗಬೇಕೆಂದೇನಿಲ್ಲ
ನನಗೆ ನೀನೆಯಾದರೂ

ಸಾಕಾಗುತ್ತದೆ..

7. ಒಡಲ ಪ್ರೀತಿಯು
ಹೊರಬಾರದಂತೆ
ಅದುಮದುಮಿ
ಇಟ್ಟುಕೊಂಡೆ
ಅದು ಉಸಿರುಗಟ್ಟಿ
ಸತ್ತುಹೋಯಿತು...!


8. ನೀ ಸಿಕ್ಕಿದಿಯೆಂಬ ಭ್ರಮೆಯಲ್ಲಿ
ಮನಸ್ಸು ಗಾಳಿಪಟವಾಗಿತ್ತು
ಭ್ರಮೆಯೆಂದು ತಿಳಿದಾಗ
ಪಟದ ಸೂತ್ರ ಹರಿದಿತ್ತು.


9. ನನ್ನ ಭಾವಗಳವು
ಒಳದಬ್ಬಿ ಪಟ್ಟಾಗಿ
ಕೂರಿಸಿದ್ದೇನೆ
ಅಡ್ಡಿ ಮಾಡಬೇಡ
ನಿನ್ನ ಸುಟ್ಟಾವು..!

10. ಕನಸುಗಳು ಆವಿಯಾಗಿ
ಬಾನಂಗಳಲಿ ಹೆಪ್ಪುಗಟ್ಟಿತ್ತು
ಕೈಗೆಟುಕದಂತೆ
ನೀ ಬಂದೆ
ನನ್ನೊಳಗೆ ಈಗ
ಕರಗಿದ ಮೋಡಗಳ ಸೋನೆಮಳೆ.



ನವೆಂಬರ್ 27, 2012

ಭಯವಾಗುತ್ತಿದೆ ನನಗೆ..

ಭಯವಾಗುತ್ತಿದೆ ನನಗೆ..
ನಿನ್ನೊಡಲ ಬೆಂಕಿಯಲ್ಲಿ ಭಸ್ಮವಾದೇನೆಂಬ ಭಯ
ನಿನ್ನ ಕಣ್ಣಿರ ಕೋಡಿಯಲ್ಲಿ ಕೊಚ್ಚಿ ಹೋದೆನೆಂಬ ಭಯ
ನಿನ್ನ ಮೌನದ ಉರಿಯಲ್ಲಿ ಬೆಂದೇನೆಂಬ ಭಯ
ನಿನ್ನ ಅಕ್ಷಿಯ ದೃಷ್ಟಿಯಲ್ಲಿ ನಾಶವಾದೇನೆಂಬ ಭಯ

ಭಯವಾಗುತ್ತಿದೆ ನನಗೆ..
ಮಾತುಗಳೆಲ್ಲ ಮೂಕವಾಗುವ ಭಯ
ಕಳಚಿಟ್ಟ ಬಂಧನ ಬಂಧವಾಗುವ ಭಯ
ವಿನಾಕಾರಣ ನಿನ್ನ ದೂಷಿಸಿದ ಭಯ
ಏಕಾಂಗಿಯಾಗಿಸಿ ನಾ ಹೊರನಡೆದೆನೆಂಬ ಭಯ

ಭಯವಾಗುತ್ತಿದೆ ನನಗೆ..
ನಿರ್ಲಿಪ್ತವಾಗಿರೋ ನಿನ್ನ ಕಂಗಳ ಭಯ
ಪಾಪಪ್ರಜ್ಞೆ ಕೊಂದೀತೆಂಬ ಭಯ
ಆಯಸ್ಸು ಧಾಪುಗಾಲು ಇಕ್ಕೀತೆಂಬ ಭಯ
ನಾ ಮಾಡಿದ ಘೋರಕ್ಕೆ ಮಡಿದೇನೆಂಬ ಭಯ
ಬದುಕಬೇಕೆಂಬ ಆಸೆಗೇ ಭಯ.


ಭಯವಾಗುತ್ತಿದೆ ನನಗೆ..
ನೀ ಹೀಗೆ ಕಾಣಿ(ಡಿ)ಸದಿರು ಹುಡುಗಿ 
ಭಯದ ನೆರಳಲ್ಲಿ 
ಭಯಂಕರ ರಾಕ್ಷಸನಿದ್ದಾನೆ
ನಾನು ಬದುಕಬೇಕು.. ಹೋಗಿ ಬಿಡು..!


                                       (ಚಿತ್ರ- ಅಂತರ್ಜಾಲ)

ಅಕ್ಟೋಬರ್ 30, 2012

ಹನಿ ಹನಿ ಇಬ್ಬನಿ ..

1. ಪ್ರತಿಯೊಂದಕ್ಕೂ
ಅಂತ್ಯವಿದೆಯಂತೆ
ನೋವುಗಳಿಗೂ
ಆ ತೆರದ್ದೊಂದು
ಇದ್ದೀತಾ?


2. ಮೌನ ಮಾತಾಗದ ಹೊರತು
ಕಂಬನಿಗಳ ತಡೆಯುವರಿಲ್ಲ
ಮಾತು ನೀನಾಗದ ಹೊರತು
ದುಮ್ಮಾನಕ್ಕೆ ಅಂತ್ಯವಿಲ್ಲ..


3.
ಮನದಲ್ಲಿ
ಕನಸ ಕಾಮನಬಿಲ್ಲು
ಹೃದಯದಲ್ಲಿ
ಪ್ರೀತಿಯ ಸೊಲ್ಲು..

4.
ಅಂಧಕಾರದ ನಡುವೆ
ಬಿಕ್ಕಳಿಸಿ ಕೂತಾಗ
ನೀ ಪೂರೈಸಿದ
ಈ ಬೆಳದಿಂಗಳೆಷ್ಟು ಹಿತ...!


5.
ಮಳೆಬಿಲ್ಲಿನಂತಹ ಭಾಂದವ್ಯಕ್ಕೆ
ಈ ಆರ್ಭಟದ
ಗುಡುಗು ಮಿಂಚುಗಳಿಗಿಂತ
ಮುಂಜಾವಿನ ತುಂತುರು ಹನಿಗಳೇ
ಸಾಕಿತ್ತು..

6.
ಬರಪೀಡಿತ ಪ್ರದೇಶಗಳಿಗೆ
ಸವಲತ್ತುಗಳು ಉಚಿತ
ಬರಪೀಡಿತ ಮನಸ್ಸುಗಳಿಗೆ...?


7. ಒಳಗೊಳಗೇ
 ಅದುಮಿಟ್ಟ ನೋವುಗಳು
 ಜ್ವಾಲಾಮುಖಿಯಂತೆ
ಸಿಡಿದು ಹೋಗಲು ತವಕಿಸುತ್ತಿರುತ್ತವೆ...


8. ಮೋಸಗಾತಿ ಎನಬೇಡ
ನಿನಗೆ ನಾ
ಮೋಸ ಮಾಡಲು ಸಾದ್ಯವಿಲ್ಲ
ಮಾಡಿದ್ದರೆ
ಅದು ನನಗೆ ನಾನೇ..!


9. ನಿನ್ನೊಳಗೆ ಬಂದು
ಈ ಪರಿ ಕಾಡಿದೆನೆಂದು
ಬೇಸರಿಸದಿರು ಗೆಳೆಯಾ
ಕಳೆದುಹೋಗಿರೋ ನನ್ನತನವ
ನಾ ಹುಡುಕುವುದು ನಿನ್ನಲ್ಲೇ..!

10. ನನ್ನಯ ಹೆಜ್ಜೆಗೆ
ಮುನ್ನುಡಿಯಾಗುವೆಯೆಂದು
ಬಂದವಳು
ಬರಿಯ ಬೆನ್ನುಡಿ ಬರೆದು
ಹೋಗಿಬಿಟ್ಟಳು..

ಅಕ್ಟೋಬರ್ 26, 2012

ನಾನ್ಯಾಕೆ ಹೀಗೆ?


ಗುಂಪು ಜನರ ಮದ್ಯೆ ಒಂಟಿಯಾಗಿರುತ್ತೇನೆ
ಮಾತು ಹರಟೆಗಳಲ್ಲಿ ಮೂಕಿಯಾಗುತ್ತೇನೆ
ನಿಂದನೆಗಳಿಗೆ ಕಿವುಡಿಯಂತಿರುತ್ತೇನೆ
ಒಡಲ ದುಃಖಕ್ಕೆ ಬಸಿರಾಗಿರುತ್ತೇನೆ

ನಾನ್ಯಾಕೆ ಹೀಗೆ?

ಎಲ್ಲವಿದ್ದೂ ಇಲ್ಲದಂತಿರುತ್ತೇನೆ
ಸುಖಗಳಲ್ಲೂ ಕಷ್ಟಗಳನ್ನೇ ಕಾಣುತ್ತಿರುತ್ತೇನೆ
ನಗು ಮರೆತಂತಿರುತ್ತೇನೆ 

ಹುಲ್ಲು ಕಡ್ಡಿಯ ಬೆಟ್ಟವೆಂದುಕೊಂಡಿರುತ್ತೇನೆ
ನಾನ್ಯಾಕೆ ಹೀಗೆ?

ತಹಬಂದಿಗೆ ಬರದ ಉಸಿರೊಳಗಿರುತ್ತೇನೆ
ನೆಮ್ಮದಿ ಸಿಗದ ಕಡಲಂತಿರುತ್ತೇನೆ
ಕಪ್ಪಿಟ್ಟಿರುವ ಆಗಸದಂತಿರುತ್ತೇನೆ
ಚಂದ್ರನಿರದ ರಾತ್ರಿಯಂತಿರುತ್ತೇನೆ

ಆದರೂ ಕೆಲವೊಮ್ಮೆ ,

ಹುಣ್ಣಿಮೆಯ ಕಡಲಂತೆ ಉಕ್ಕುತ್ತಿರುತ್ತೇನೆ
ವರುಣನ ನಿರೀಕ್ಷೆಯ ನವಿಲಂತೆ ಕುಣಿಯುತ್ತಿರುತ್ತೇನೆ
ಪಾದರಸದಂತೆ ಪುಟಿಯುತ್ತಿರುತ್ತೇನೆ
ಸ್ವರ್ಗದ ತುದಿಯಲ್ಲಿದ್ದಂತೆ ಬೀಗುತ್ತಿರುತ್ತೇನೆ..

ಒಮ್ಮೊಮ್ಮೆ ಹಾಗೆ...ಇನ್ನೊಮ್ಮೊಮ್ಮೆ  ಹೀಗೆ

ಕೊನೆಗೂ ತಿಳಿಯಲಿಲ್ಲ..
ನಾನ್ಯಾಕೆ ಹೀಗೆ?





ಅಕ್ಟೋಬರ್ 23, 2012

ಕುಂತಿಯರು..!

ವರ ಸಿಕ್ಕಿದ ಭ್ರಮೆಯಲ್ಲಿ 
ಜಗವ ಮರೆತವಳು 
ನಶೆಯ ಮತ್ತಲ್ಲಿ
ಹರೆಯದ ಕೊಳ ಈಜಿದವಳು 

ಅವನೋ ಕೊಡವಿಕೊಂಡು ಎದ್ದನು 
ಇವಳು ಎಡವಿ ಬಿದ್ದಳು 
ನಿಲ್ಲೆಂದರೆ ಅಂವ ಕೇಳ 
ಬಾರದಿರೆಂದರೆ ಬಸಿರು ಕೇಳ 

ಅವರವರಿಗೆ ಅವರವರ ಬದುಕು 
ಗಂಡಸೋ ಬದುಕಿ ಬಿಡುತ್ತಾನೆ 
ಹೆಂಗಸೂ ಬದುಕಿ ಬಿಡುತ್ತಾಳೆ 
ಬಲಿಯಾಗಿದ್ದು ಬಡಕೂಸು 
 
ಅನಾಥಾಶ್ರಮದ ಬಾಗಿಲಲ್ಲಿ 
ಕಸದ ತೊಟ್ಟಿಯಲ್ಲಿ 
ನಾಯಿ ನೊಣಗಳ ದಬ್ಬಾಳಿಕೆಯಲ್ಲಿ 
ಉಸಿರುಗಟ್ಟಿಸುವ ಯಾತನೆಯಲ್ಲಿ 
ಸಾವು ಬದುಕಿನ ಅನಿಶ್ಚಿತತೆಯಲ್ಲಿ 
ಅದರ ಜನನ 

ಜೀವ ಕೊಟ್ಟು 
ಜೀವನ ಕಸಿದುಕೊಂಡವರು..!
ಈ ಅಧುನಿಕ ಕುಂತಿಯರು..!



ಅಕ್ಟೋಬರ್ 19, 2012

ಹನಿ ಹನಿ ಇಬ್ಬನಿ...

1. ನೀ ಮಾಡಿದ
ಗಾಯಕ್ಕೆ ಔಷಧಿ
ಯಾರೂ ನೀಡುತ್ತಿಲ್ಲ
ನೀನೇಯಾದರೂ ಬರುತ್ತಿಯಾ?
ಉರಿ ತಾಳಲಾಗುತ್ತಿಲ್ಲ..

2. ಉಕ್ಕಿ
ಬಿಕ್ಕುತಿಹ
ಎದೆಯ ದುಃಖಕ್ಕೆ
ನಿನ್ನ ಹೆಗಲಿತ್ತು..
 
3. ನಿನ್ನ ಮಾತಿನ
ಹುಚ್ಚು ಹೊಳೆಯಲ್ಲಿ
ನನ್ನ ಮೌನ
ಕೊಚ್ಚಿಹೋಯಿತು...!

4. ನಿನಗಿಂತಲೂ
ಹೆಚ್ಚು ಚಂದವಾಗಿ
ಕಾಣುವುದು-ಕಾಡುವುದು
ನೆನಪುಗಳೇ..!

5. ತಪ್ಪುಗಳೆಂದು
ಗೊತ್ತಿದ್ದೇ ಮಾಡುವ
ತಪ್ಪುಗಳು
ಮುಂದೊಂದು ದಿನ
ಒಪ್ಪುಗಳಾಗಿ ಬಿಡುತ್ತದೆ..!


6. ವ್ಯತ್ಯಾಸ ಇಷ್ಟೇ...!
ದುತ್ತನೆ ಎದುರಾಗಿ
ಸಿಗಿದ ನಿನ್ನ ನೆನಪುಗಳು
ಸಾಯಿಸಿತ್ತು
ಊರಿಂದ ಬರುವಾಗ
ಅಮ್ಮ ಕಟ್ಟಿ ಕೊಟ್ಟ ಕನಸುಗಳು
ಬದುಕಿಸಿತ್ತು..


7. ಚಿತ್ರ ವಿಚಿತ್ರವಾಗಿ
ದಿನ ರಾತ್ರಿ
ಬಿಡದೆ ಕಾಡೋ
ಕನಸುಗಳು - ಪ್ರೇತಾತ್ಮದಂತೆ !
ಅವುಗಳಿಗೆ ಮುಕ್ತಿ ಬೇಕು!


8. ಯಾರೋ ಹೇಳಿದರು
ನಾ ಗಟ್ಟಿಗಿತ್ತಿಯೆಂದು
ಅದಕ್ಕೆ
ನನ್ನೊಳಗಿನ ಪುಕ್ಕಲಿಯನ್ನು
ಆಗಾಗ ಒಳದಬ್ಬುತ್ತಲೇ
ಇರುತ್ತೇನೆ...!



9. ನೀ ಬಂದು
ಬದುಕು ಪ್ರಕಾಶಮಾನವಾಗಿ
ಉರಿದಾಗಲೇ
ನನಗರಿವಾಗಬೇಕಿತ್ತು
ಇದು ಆರುವ ಹಣತೆ ಎಂದು..!



10. ನೋವುಗಳು ಅರೆಬೆಂದು
ಯಾತನೆ ನೀಡುವುದಕ್ಕಿಂತ
ಸುಟ್ಟು ಕರಕಲಾಗಿ ಬಿಡಲಿ
ಅವಶೇಷವೂ ಉಳಿಯದಂತೆ.   




 

ಅಕ್ಟೋಬರ್ 17, 2012

ನಮ್ಮವರು..!

ನೋವುಗಳ ಬೆಂಕಿಯಲ್ಲಿ
ಒಡಲು ಉರಿಯುತ್ತಿರುವಾಗ
ತುಪ್ಪ ಸುರಿದವರು..


ಬಯಕೆಗಳ ಗೋರಿಯಲ್ಲಿ
ಬದುಕು ನರಳುವಾಗ
ಹನಿ ನೀರು ಬಿಡದವರು..


ಬೆಳಕ ದಾರಿಯ ಸರಿಸಿ
ಕಗ್ಗತ್ತಲ ಕೂಪಕ್ಕೆ

ತಳ್ಳಿಹೋದವರು..


ಮುಗ್ಗರಿಸಿ ಬಿದ್ದಾಗ
ಚೆಲ್ಲಿದ ಕನಸುಗಳ
ತುಳಿಯುತ್ತಾ ಸಾಗಿದವರು..


ಸೋಲಿನ ರಭಸದ ಛಡಿಯೆಟಿಗೆ
ಮೂಲೆ ಸೇರಿದಾಗ
ಮತ್ತೊಂದು ಪೆಟ್ಟು ನೀಡಿದವರು..


ದುಃಖದ ಬೇನೆಗೆ ಕುದಿಯುತ್ತಿದ್ದ
ನನ್ನೊಡಲ ರಕುತದಲ್ಲೇ
ತಮ್ಮ ದಾಹ ತೀರಿಸಿಕ್ಕೊಂಡವರು


ಇಂತಿಪ್ಪ ಇವರು - ನಮ್ಮವರು..!

ಸೋಲುಗಳ ಮೆಟ್ಟಿಲಲ್ಲಿ
ಗೆಲುವಿನ ಸೌಧ ಕಟ್ಟಿದಾಗ
ನಗೆಯ ಹೊತ್ತು ಬಂದವರು..!


-ಇವರು ನಮ್ಮವರು..!


ಅಕ್ಟೋಬರ್ 9, 2012

ಹನಿ ಹನಿ ಇಬ್ಬನಿ..

1. ಚಿಂತೆಯ ಕರಿಮೋಡ
ನನ್ನಯ ಚಂದ್ರಮನನ್ನು
ಮುತ್ತಿದಾಗ
ನನ್ನೀ ಬಾಳ ತುಂಬಾ
ಕಗ್ಗತ್ತಲೇ...


2. ದುಃಖದಲ್ಲೇ
ಬದುಕು ಸುಖವಾಗಿದೆ
ಎಂದುಕೊಂಡು
ಕಣ್ಣು ತುಂಬಿಕೊಳ್ಳುತ್ತೇನೆ..!


3. ಯಾರೋ ಅದೇನೋ
ಹೇಳಿದರೆಂದು
ಸಾಯುವುದಿದ್ದರೆ
ನಾ ಅದೆಷ್ಟು ಬಾರಿ
ಸಾಯಬೇಕಿತ್ತು....?!


4. ತಾರಕಕ್ಕೆರಿದ್ದ
ಹುಚ್ಚು ಮುನಿಸು
ನಿನ್ನ ಮುದ್ದಿನ ಮದ್ದಲ್ಲಿ
ಕಾಣೆಯಾಯಿತು...

  
5. ಜಾಣೆ-
ತಿರುವಿನ
ದಾರೀಲಿ
ಎಡವಿ
ಬೀಳುತ್ತಾಳೆ..!


6. ಬದುಕಿನ ಕೊನೆವರೆಗೂ
ಜೋತೆಯಾಗಿರುತ್ತೆನೆಂದವನು
ಮನೆಯ ಪಕ್ಕದ ತಿರುವಿನವರೆಗೆ
ಬರಲಾಗದೆ ಹೋದ..!


7. ಬವಣೆಗೆ ಬದುಕು ಸತ್ತಿದೆ
ಸತ್ತ ಬದುಕಿಗೂ
ಬದುಕುವ ಬಯಕೆಯಾಗಿದೆ
ಬಯಕೆಗೆ ಬದುಕಿಲ್ಲ
ಬದುಕು ಮತ್ತೆ ಸತ್ತಿದೆ...!!!!

  
8. ಎದೆಯ ಬಿರುಗಾಳಿ
ರಪ್ಪೆಂದು ನಿನ್ನೆದೆಗೆ
ರಾಚಿದಾಗ
ಎದೆಯೊಡ್ಡಿ
ನಿಂತಿದ್ದೆಯಲ್ಲಾ....!


9. ನಿನ್ನ
ಜಾಣ ಕಿವುಡುತನದ
ಮುಂದೆ, ನಾ
ಮೂಕಿಯಾಗಿರಬೇಕಿತ್ತು.

  
10. ಬಿತ್ತಿ ಬುಲೆ
ಕೈ ಪತ್ತುದುಂಡು
ನೀನ್ನೋ ಉಡಲ್ ದಿಂಜಿ

ಮೊಕೆದ ಲೆಕ್ಕೊನೆ
(ತುಳು ಭಾಷೆ)

ಸೆಪ್ಟೆಂಬರ್ 25, 2012

ಹನಿ ಹನಿ ಇಬ್ಬನಿ...

1. ಒಂಟಿತನವನ್ನೇ
ಉಸಿರಾಡಿದವಳಿಗೆ
ಸಂಬಂಧಗಳ್ಯಾಕೋ
ಉಸಿರುಕಟ್ಟಿಸುತ್ತವೆ...!


2. ಒಡಲ ಬಗೆದು
ಒಡಲ ನೋವ
ಶಮನ
ಮಾಡುತ್ತೇನೆಂದವರು..!!


3. ಇವನು-
ಅಮಾವಾಸ್ಯೆಯಂತಹ
ಬದುಕಲ್ಲಿ
ಹಾಲು ಬೆಳದಿಂಗಳ
ಸುರಿಸಿದ ಚಂದ್ರಮ...


4. ಅಮ್ಮ-
ಒತ್ತಿ ಬರುವ
ದುಃಖಕ್ಕೆ
ತಡೆಗೋಡೆಯಾಗಿ
ನಿಂತವಳು...


5. ಅವಳ ಜೊತೆ
ನಿನ್ನ ಕಂಡಾಗಲೇ
ಅಸಹನೆಯ
ಹೊಗೆಯಾಡಿದ್ದು...!


6. ನೀ ಜೊತೆ ಇರೆ
ನಿನ್ನ ಕಣ್ಣ ಬೆಳಕಲ್ಲೇ
ಕತ್ತಲ ಸರಿಸಿ
ಬದುಕ ಸವೆಸಿಯೇನು..


7. ನನ್ನೊಲುಮೆ
ಆಕಾಶದಷ್ಟು ವಿಶಾಲ
ಎನ್ನುತ್ತಿದ್ದಂತೆಯೇ
ನಿನ್ನ ಪ್ರೀತಿಯ
ಕ್ಷೀರಸಾಗರದಲ್ಲಿ
ಮಿಂದಿದ್ದೆ...


8. ನಿನ್ನ ಜಾಗವನ್ನು
ಯಾರೂ ತುಂಬಲಾರರು
ಎನ್ನುತಿದ್ದೆ...
ಈಗ ನನ್ನವಳು ಆ ಮಾತನ್ನ
ಸುಳ್ಳಾಗಿಸಿದ್ದಾಳೆ.


9. ಕೆನ್ನೆ ತೋಯಿಸಿದ
ನೆನಪುಗಳೆಲ್ಲ ಮುತ್ತಾಗಿವೆ...
ನಾ ಮುತ್ತುಗಳ
ರಾಣಿಯಾಗಿದ್ದೇನೆ..!!


10. ನೆನಪಿನ
ಹೂಜಿಯಲ್ಲಿ
ಕನಸಿನ ಬೀಜ
ಮೊಳಕೆಯೊಡೆದಿದೆ...

ಸೆಪ್ಟೆಂಬರ್ 17, 2012

HAPPY BIRTHDAY TO YOU

ಇವನು-
ಖಾಲಿ ಮನಸಿಗೆ ಕನಸು ತಂದವನು
ನೀರಸ ಬದುಕಿಗೆ ಬೆಳಕ ತಂದವನು

ಬಳಲಿದ ಕಂಗಳಿಗೆ ಕಾಂತಿಯ ತಂದವನು
ಬರಿದಾದ ಹೃದಯಕ್ಕೆ ಒಡೆಯನಾಗಿ ಬಂದವನು
ನನ್ನ ದನಿಗೆ ಕಿವಿಯಾದವನು
ಸುಮ್ಮಸುಮ್ಮನೆ ಬೇಸರಿಸಿದವನು

ನನ್ನೊಳಗೆ ಸಾವಿರ ಹಣತೆಗಳ ಹಚ್ಚಿಟ್ಟವನು
ಕೈ ಹಿಡಿದು ಮುನ್ನಡೆಸಿದವನು
ನನಗಾಗೆ ನಾಲ್ಕು ಸಾಲು ಗೀಚಿ ಕವಿಯಾದವನು
ಹಣೆಯ ಮುತ್ತಲ್ಲಿ ಧೈರ್ಯ ಹೇಳಿದವನು

ದೇಹಕ್ಕೆ ಜೀವವಾಗಿ ಬಂದವನು
ಜೀವದ ಉಸಿರಾದವನು
ಹೃದಯದ ಮಿಡಿತವಾದವನು
ಬಿಗಿ ಅಪ್ಪುಗೆಯಲ್ಲಿ ನೋವ ಮರೆಸಿದವನು

ನನ್ನೊಳಗೆ ಎಲ್ಲವೂ ಆದವನು
ನನ್ನ ಪ್ರಾಣ ಪದಕ - ಇವನು.





 HAPPY BIRTHDAY TO YOU

ಹುಟ್ಟು ಹಬ್ಬದ ಸಂಭ್ರಮದಂತೆ
ಜೀವಮಾನವಿಡಿ ಸಡಗರ ತುಂಬಿರಲಿ

ಸಾಲು ದೀಪಗಳ ಬೆಳಕಂತೆ
ಜೀವನ ಬೆಳಗುತಿರಲಿ
ಸುಖ ಸಂತೋಷ ನೆಮ್ಮದಿಗಳು
ಮೊಗೆ ಮೊಗೆದು ಬರುತಿರಲಿ

ಹುಟ್ಟು ಹಬ್ಬದ ಶುಭಾಶಯಗಳು ನನ್ನ ಜೀವವೇ...


ಸೆಪ್ಟೆಂಬರ್ 15, 2012

ಮೌನರಾಗ...!

ಈ ನನ್ನ ಮೌನರಾಗಕ್ಕೆ ಎರಡು ವರ್ಷದ ಸಂಭ್ರಮ...ಬ್ಲಾಗ್ ಲೋಕದ ಪರಿಚಯವಾಗಿ ಎರಡು ವರ್ಷಗಳು ತುಂಬಿ ಬಿಟ್ಟವೇ..!? ನನ್ನಲ್ಲಿ ಅಚ್ಚರಿ...!
ನೋಟ್ ಬುಕ್ಕಿನ ಕೊನೆಯ ಹಾಳೆಯಲ್ಲಿ, ಡೈರಿಯ ಮೂಲೆ ಮೂಲೆಯಲ್ಲಿ ಅವಿತಿರುತ್ತಿದ್ದ ತಿರುಗು ಮುರುಗು ಸಾಲುಗಳೆಲ್ಲ ಈಗ ಮೌನರಾಗದಲ್ಲಿ ಬೆಚ್ಚಗಿವೆ.. ಬರೆದಿದ್ದು ತೀರಾ ಕಡಿಮೆ.. ಆದರೂ ಅಂತರಂಗದ ಒತ್ತಡಗಳನ್ನು ನಿವಾರಿಸಿದ, ಸಂತೋಷಕ್ಕೆ ಜೊತೆಯಾದ ಕೀರ್ತಿ ನನ್ನ ಬ್ಲಾಗ್ ಗೇನೇ ಸಲ್ಲುತ್ತದೆ...ಕೆಲವೊಮ್ಮೆ ಇಂತಹ ಅಂತರಂಗದ ಗೆಳತಿಯನ್ನೂ ಅಂತರಂಗದಿಂದ ದೂರವೇ ಇಟ್ಟಿದ್ದೇನೆ.. ಎರಡು ಮೂರು ತಿಂಗಳು ಸುಮ್ಮನಿದ್ದು ನಾಲ್ಕನೆ ತಿಂಗಳಿಗೆ ಮಾತಾಡಿದ್ದು ಇದೆ..ಮೌನ ಮೌನವೇ..! ಆದರೂ ಇದು ಮೌನಾಂ'ತರಂಗ'.... ಮೀಟಿದ ಭಾವ'ತರಂಗ'...!!



’Sweet & Simple Girl....’ ನನ್ನ ಬಗ್ಗೆ ನಾನೇ ಹಾಕಿಕೊ೦ಡು ಬೆನ್ನು ತಟ್ಟಿಕೊ೦ಡಿದ್ದೇನೆ..
ನಿಜಕ್ಕೂ ನಾನ್ಯಾರು...!?
ನಾನು ಮೌನರಾಗ..! ಹೀಗೆಂದು ಹೇಳಿಕೊಳ್ಳುತ್ತೇನೆ..!
ನಿಜ ನಾಮಧೇಯ ಸುಷ್ಮಾ. ಊರು ಮೂಡುಬಿದಿರೆ.
ಕರಾವಳಿಯ ಹುಡುಗಿ.. ಕೆಲಸದ ನಿಮಿತ್ತ ಸಧ್ಯಕ್ಕೆ ಬೆಂಗಳೂರಿನಲ್ಲಿ ವಾಸ.. ಊರು, ಮನೆ, ಅಮ್ಮ ಎಂದರೆ ಜೀವ, ತುಡಿತ, ಮಿಡಿತ...
ಬದುಕಿನೆಡೆಗೆ ಹಾಕುತ್ತಿರುವ ಪುಟ್ಟ ಪುಟ್ಟ ಹೆಜ್ಜೆಗಳಲ್ಲಿ ನೋವು, ನಿರಾಸೆ, ಪ್ರೀತಿ ಮತ್ತು ಕನಸು...
ನನಗೆ ನಾನೇ ಹಾಕಿಕೊಂಡ ಕಟ್ಟುಪಾಡುಗಳಲ್ಲಿ ಕನಸಿನ ಬದುಕು..
ತೀರಾ ಬರೆಯಬೇಕೆಂದು ಹೊರಟವಳಲ್ಲ... ಹೃದಯದ ಮಾತುಗಳಿಗೆ ಕಿವಿಯಿರಲಿ ಎಂದೆನಿಸಿದಾಗ ಬರೆದ್ದಿದ್ದು ಇಷ್ಟು ದೂರ ಎಳೆದುಕೊ೦ಡು ಬಂದಿದೆ.. ಒಂದಷ್ಟು ಸಹೃದಯಿ ಗೆಳೆಯರನ್ನು ಕೊಟ್ಟಿದೆ..ತಪ್ಪಾದಾಗ ತಿದ್ದಿ ಹೇಳುವ, ಪ್ರೋತ್ಸಾಹಿಸುವ ಸನ್ಮಿತ್ರರನ್ನು ಒದಗಿಸಿದೆ..ಬರೆದಿದ್ದು ಇಷ್ಟೇ ಇಷ್ಟಾದರೂ ಧನ್ಯತೆಯಿದೆ.. ಅದಕ್ಕಾಗಿ ನಾನು ಋಣಿ..

ಸೆಪ್ಟೆಂಬರ್ 12, 2012

ಹನಿ ಹನಿ ಇಬ್ಬನಿ..

1. ಮರೆತ ನೆನ್ನೆಯ
ನೆನಪಾದಾಗ
ಜಾರಿದ ಕಣ್ಣ ಹನಿಯಲ್ಲೂ
ನಿನ್ನದೇ ಬಿಂಬ..!


2. ನಿನ್ನ ನೆನಪುಗಳ
ಹೂತಿಡಬೇಕು
ನನ್ನ ಹೃದಯ
ಹಿಂದಿರುಗಿಸುತ್ತಿಯಾ...?

3. ನಿನ್ನ ತೋಳಿಡಿದು
ಓಡಾಡಲಾಗದ
ಈ ಸಂಜೆಗಳೆಂದರೆ
ನನಗೆ ರೇಜಿಗೆ..!

4. ನೀ ನನ್ನ
ಹೃದಯವನ್ನು
ಕೇಳುವುದಕ್ಕಿಂತ
ಪ್ರಾಣ ಕೇಳಬೇಕಾಗಿತ್ತು!

5. ನಿನ್ನ ನೆನಪಿನಿಂದ
ಕೆನ್ನೆ ಜಾರಿದ ಹನಿಗಳೆಲ್ಲ
ಮುತ್ತಾಗಿವೆ
ಸಿಗುತ್ತಿಯಾ?
ನಿನ್ನ ನೆನಪುಗಳನ್ನು
ಹಿಂದುರಿರುಗಿಸಬೇಕು..

6. ಪ್ರೇಮ ಗೀತೆಗಳಿಗಿಂತ
ವಿರಹ ಗೀತೆಗಳೇ
ಹೆಚ್ಚು ಕಾಡುವುದು
ನಿನ್ನ ನೆನಪುಗಳಿಂದಾನೆನ?

ಸೆಪ್ಟೆಂಬರ್ 8, 2012

ಹನಿ ಹನಿ ಇಬ್ಬನಿ..

1. ನನ್ನೆದೆಯ ಬಾಗಿಲು ತೆರೆದಿದೆ
 ಹಿಂದುರುಗುತ್ತಿಯಾ?
ನನ್ನೊಡಲ ನೋವನ್ನು
ನಿನ್ನ ಮಡಿಲಿಗೆ ಹಾಕಿ
ಹಗುರಾಗಬೇಕು...!


2.
ಬಯಸಿದ್ದೆಲ್ಲ ಸಿಗುವಂತಿದ್ದರೆ
ನೀನೇ ಬೇಕೆಂದು
ನಾ ಬೇಡುವುದಕ್ಕೆ
ಅರ್ಥವೇನಿರುತ್ತಿತ್ತು?!


3.
ದಕ್ಕಿದ್ದು ಸಿಗಲಿಲ್ಲವೆಂದು
ನಾ ಎದೆಬಡಿದು ಅತ್ತಿದ್ದು
ಸುಮ್ಮನಲ್ಲ..
ಸಿಗದಾಗ ಸೋರಿ ಹೋಗಿದ್ದು
ನನ್ನ ನಿನ್ನ - ಬದುಕು..!!


4.
ನೀ ತೀರಾ ಸನಿಹ ಬಂದು
ಸೋಕಿದಾಗಲೇ
ನನಗರಿವಾಗಿದ್ದು
ನಿನ್ನ ಉಸಿರಲೂ
ನನ್ನ ಹೆಸರಿರುವುದು..!


5. ಪ್ರೀತಿಯೆಂದರೆ
ನೀನು ಮತ್ತು ನೀನು ಮಾತ್ರ
ಮತ್ತು ಬದುಕೆಂದರೆ
ನಾನು ಮತ್ತು ನಾನು ಮಾತ್ರ!!


6.
ಬದುಕಿಗಾಗಿ ನೀನೋ
ನಿನಗಾಗಿ ಬದುಕೋ
ಅರ್ಥವಾಗದೇನೆ
ನಿನ್ನೊಂದಿಗೆ ಇಷ್ಟು ದೂರ
ಕ್ರಮಿಸಿಬಿಟ್ಟೆ...!


7.
ಜೀವನದ ಮಜಲುಗಳ
ಎಳೆ ಬಿಡಿಸುವುದು ಕಷ್ಟ
ಎಂದು ಕೈಚೆಲ್ಲಿದ್ದಾಗಲೇ
ನನಗೆ ನೀನು ಕಾಣಿಸಿಬಿಟ್ಟೆ.


8.
ನೀ ಮನದಲ್ಲಿ ಮೂಡಿಸಿದ
ನಿನ್ನ ನೆನಪುಗಳ ಹೆಜ್ಜೆಗಳೇ
ಇಂದು ನನ್ನ ಬದುಕಲ್ಲಿ
ಭರವಸೆಯ ದೀಪವಿಡಿದು
ಮೆರವಣಿಗೆ ಹೊರಟಿರುವುದು..!


9.
ನೆನ್ನೆ ರಾತ್ರಿ
ಗುಡುಗು ಮಿಂಚಿನೊಂದಿಗೆ
ಸುರಿದ ಜಡಿಮಳೆ
ನಿನ್ನ ನೆನಪುಗಳದ್ದೆನಾ?


10. ನಾ ಮುಖ ಬಾಡಿಸಿ ಕೂತರೆ
ನೀ ಬರುವವನೇ ಎಂದು ಗೊತ್ತಿತ್ತು
ಅದಕ್ಕೆ ನೆನ್ನೆ ಸಂಜೆ
ಮಾವಿನ ತೊಪಲ್ಲಿ ಹಾಗೆ ಕುಳಿತಿದ್ದು..!

 

ಸೆಪ್ಟೆಂಬರ್ 5, 2012

ಹನಿ ಹನಿ ಇಬ್ಬನಿ..!!

1.ನೀ ನನಗೆ
ಸುಂದರವಾಗಿ ಕಾಣುವುದು
ನಿನ್ನ ಸೌಂದರ್ಯದಿಂದಲ್ಲ ಗೆಳೆಯಾ
ಚಿಗುರುಮೀಸೆಯಡಿಗಿನ
ಆ ನಿನ್ನ ಕಿರುನಗೆಯಿಂದ..!


2.ನಿನ್ನ ಮೇಲಿನ ಕೋಪಕ್ಕೆ
ನಿನ್ನ ಜಡತ್ವಕ್ಕಲ್ಲ ಗೆಳೆಯಾ
ನಾ ವಿಚ್ಚೇದನ ನೀಡಿದ್ದು
ಅದು- ನನ್ನ ಬದುಕಿಗೆ..!

3.ಹಿರಿಯರು ತೆಪ್ಪಗಾದರೆ
ಕಿರಿಯರು
ಕೆಪ್ಪರಾಗುವುದರಲ್ಲಿ
ಆಶ್ಚರ್ಯವಿಲ್ಲ...!


4.ಮನದ ಮೂಲೆಯಲ್ಲಿ
ಹುಟ್ಟಿಕ್ಕೊಂಡ
ಪ್ರಶ್ನೆಗಳಿಗೆ ಉತ್ತರ
ನೀನೇ....!!

5.ಜೀವಕ್ಕೆ ಜೀವ
ಕೊಡುತ್ತೆನೆಂದಿದ್ದು
ನಿನಗಲ್ಲ ಗೆಳೆಯಾ
ನನ್ನ ಪ್ರೀತಿಗೆ..!


6.ಮುಚ್ಚಿಟ್ಟ ಹೃದಯದಲ್ಲಿ
ಬಿಚ್ಚಿ ಹೋದ ಕನಸುಗಳು
ರಾಡಿಯಾಗಿದೆ
ಕೂಡಿಡುವ ನಂಟಿನ ಗಂಟು
ನನ್ನಲ್ಲಿಲ್ಲ..
ನೀನಂತೂ ಬರುವುದಿಲ್ಲ
ಹೃದಯದ ಉಸಿರು ಬಿಗಿಯಾಗಿದೆ
ನಿಂತು ಹೋಗುವ ಭಯ ನನಗಾಗಿದೆ
ದಯಮಾಡಿ ನನ್ನ ಕನಸುಗಳ
ಕಟ್ಟಿಕೊಡು
ನಾನು ಬದುಕಬೇಕು
ನೀನಿಲ್ಲದೆಯೂ...!!


7.ಬದಲಾಯಿಸಿಕ್ಕೊಳ್ಳದ
ನಿನ್ನನ್ನು
ನೋಡನೋಡುತ್ತಲೇ
ನಾ
ಬದಲಾಗಿಬಿಟ್ಟೆ.....!!!


ಆಗಸ್ಟ್ 8, 2012

ಅಂತರಂಗದ ಪುಟಗಳು..


ಅಂತರಂಗದ ಪುಟಗಳು ಹಾಗೆಯೇ..!!
-ತೆರೆದುಕೊಳ್ಳುವುದಿಲ್ಲ..

ಕಟ್ಟಿ ಕೂಡಿ ಕಳೆಯುವುದಕ್ಕೆ ಬರುವುದಿಲ್ಲ 
ನೂಕು ನುಗ್ಗಲು ದೂಕಿ ಹೊರಡುವುದಿಲ್ಲ
ಪ್ರಶ್ನೆಗಳಿಗೆ ಉತ್ತರ ಬೇಡುವುದಿಲ್ಲ.
ನೆನಪುಗಳ ನಾವೆಯಲ್ಲಿ ಒಂಟಿ ಪಯಣ
ಉಬ್ಬಿದ ಕೊರಳ ಸೆರೆಗೆ ಉಸಿರ ಸಾಂತ್ವನ 

ಅಂತರಂಗದ ಪುಟಗಳು ಹಾಗೆಯೇ...!
-ತೆರೆದುಕೊಳ್ಳುವುದಿಲ್ಲ...

ಬೇಕು ಬೇಡಗಳ ಪ್ರಶ್ನೆಯೇ ಇಲ್ಲಾ
ಮೌನದ ಪರಿಧಿಯೊಳಗೆ ಮುಚ್ಚಿಕ್ಕೊಳ್ಳುತ್ತದೆ
ಭಾವದ ಅಲೆಗಳಲ್ಲಿ ತನ್ನ ತಾನು ಬಡಿದುಕೊಳ್ಳುತ್ತದೆ
ಹಿರಿದು ಕಿರಿದುಗಳ ಬರಿದಾಗಿಸುತ್ತದೆ
ಹೃದಯದ ತುಮುಲಕ್ಕೆ ಅಟಮಟಿಸುತ್ತದೆ.

ಅಂತರಂಗದ ಪುಟಗಳು ಹಾಗೆಯೇ..!!
-ತೆರೆದುಕೊಳ್ಳುವುದಿಲ್ಲ..


ಏಪ್ರಿಲ್ 10, 2012

ನಿರೀಕ್ಷೆ...

ಕನಸಿನರಮನೆಯ ನಿನ್ನದಾಗಿಸಿ
ಮನಸಿನ ಭಾವಾನುರಾಗ ನನ್ನದಾಗಿಸಿರುವೆ
ಕನಸು-ಮನಸು ಅದಲು ಬದಲಾಗಿಸಿ
ಬೀಸಿದ ಗಾಳಿಯ ತಂಗಾಳಿಯಾಗಿಸಿ
ನಾ ನಿನ್ನೊಳಗೇ ಸೇರಿ ಬಿಟ್ಟಿರುವೆ


ನಿನ್ನ ಕಿರುನಗೆಯಲ್ಲಿ ಕರಗಿ
ಮಂದಹಾಸದಲ್ಲಿ ಮಿನುಗುತ್ತೇನೆ
ಕಣ್ಣಹನಿಯಲ್ಲಿ ಸತ್ತು
ಹೃದಯದಲ್ಲಿ ಬದುಕುತ್ತೇನೆ
ನಿನ್ನುಸಿರಲ್ಲಿ ಕನಸಿಟ್ಟು
ನನ್ನುಸಿರ ಅಡವಿಡುತ್ತೇನೆ..

ಅಪರಿಚಿತ ಭಾವವೊಂದು ಒಳಸೇರಿ
ಪರಿಚಯವಾಗಿ ಕಾಡುತಿದೆ
ಮನದ ಚುಕ್ಕಿಯ ರಂಗೋಲಿ
ರಂಗು ಅರಸುತಿದೆ 
ಬಿರಿದ ನೆನಕೆಗಳ ಗಂಧ
ಬಾಗಿಲಾಚೆಗೆ ಕಣ್ಣು ನೆಟ್ಟಿದೆ 

ಒಡಮೂಡಿದ ಭಾವಗಳ ಬಂಧ
ನಿನ್ನಲ್ಲಿ ಬೆಸೆಯಬೇಕು
ಯಾವಾಗ ಸಿಗುತ್ತಿಯಾ ಹುಡುಗಾ? 

ಫೆಬ್ರವರಿ 16, 2012

ನಿತ್ಯ ನಿರ್ಲಿಪ್ತ..!

ಅನುರಾಗದ ಭೂಮಿಕೆಯಲ್ಲಿ 
ಬಿಡದೆ ಕಾಡುವ ನಿನ್ನ ಭಾವಬಿಂಬಗಳು
ಜಡಿಮಳೆಯಂತೆ ಸುರಿವ ನೆನಪುಗಳು 
ಕನಸು ಕಣ್ಣಿನ ಪ್ರೀತಿ ಹನಿಗಳು
ನನ್ನೆದೆಯ ಹುಡುಗ ಇಣುಕುತ್ತಿದ್ದಾನೆ ಅಲ್ಲಿ
ತಾ ನಿತ್ಯ ನಿರ್ಲಿಪ್ತನೆಂಬ ಸ್ಥಿತಿಯಲ್ಲಿ..!

ಒಮ್ಮೊಮ್ಮೆ ದೀನ ಸ್ಥಿತಿ 
ಪಾದ ಮುಟ್ಟಿ ಬೇಡಿ, ಒಪ್ಪಿಸಿಕೋ ಎನ್ನುವಂತೆ
ಮಗದೊಮ್ಮೆ ಹೇರಳ ಆಸ್ಥೆ 
ಬಿಡದೆ ಭೋರ್ಗರೆದು 
ಮನದ ಬಂಡೆಗೆ ಅಪ್ಪಳಿಸುತ್ತದೆ
ಕರಗಿತೇನೋ ಎನ್ನುವಂತೆ..
ಹಂಬಲಿಕೆಯೇ ಬದುಕಾದಂತೆ..!
ಚಿಮ್ಮುವ, ಪಿಸುಗುಡುವ ಸವಿನೆನಪುಗಳು
ಭ್ರಮೆಯ ಕಣ್ಣುಗಳಂತೆ!
ಅವನು ಮಾತ್ರ ನಿತ್ಯ ನಿರ್ಲಿಪ್ತ..

ಇಂದಲ್ಲ ನಾಳೆ ಜೊತೆಯಾಗಿ ಬಂದಾನು
ಸಾವಿರ ಕನಸಿಗೆ ರಂಗು ತಂದಾನು
ಕಾರ್ಮೋಡ ಕರಗಿ ಮಳೆಯಾಗಿ ಹನಿಸುವುದನ್ನು 
ಕಾಣಲು ತವಕಿಸುತ್ತಿದ್ದೇನೆ ಇನ್ನಿಲ್ಲದಂತೆ



ಫೆಬ್ರವರಿ 8, 2012

ಕನಸ ಖಜಾನೆ..

ಅಟ್ಟದ ಮೇಲೊಂದು ಇಟ್ಟಿಗೆಯ ಬದಿಯಲ್ಲಿ
ಕನಸ ಖಜಾನೆಗೆ ಬೀಗ ಜಡಿದು ಇಟ್ಟುಬಿಟ್ಟಿದ್ದೆ 
ಸುಮ್ಮನಾದರೂ ಕೂರುತ್ತ, ಅಲೆಯುತ್ತಾ
ದಿಕ್ಕಿಲ್ಲದೆ ಎಡವುತ್ತಾ, ಪರದಾಡುತ್ತಾ..!
ಖಜಾನೆಯ ಕೀಲಿಕೈ ಕಳೆದುಹೋಗಿತ್ತು 
ಒಳಗಿನ ಕನಸುಗಳಂತೆ..
ದುಃಖವಿರಲಿಲ್ಲ..!
ಕತ್ತಲ ಬೆನ್ನಿಗೆ ಬೆಳಕು ಸುತ್ತಲೂ
ಕಳೆದುಹೋದುದು ತಡಕಾಡಿತು
ಜಡಿದ ಬೀಗ ಮುರಿದು ಹೋಯಿತು 
ಅಂಧಃಕಾರದ  ಕಾನನದಲ್ಲಿ
ಎತ್ತಲೊಂದು ಸೂರ್ಯರಶ್ಮಿ 
ಹೂ ಬಿಸಿಲು ಆವರಿಸುತ್ತದೆ ಮುತ್ತಿಡುತ್ತದೆ, 
ತೆರೆದ ಪೆಟ್ಟಿಗೆಯಲ್ಲಿ ರಾಶಿ ಕನಸುಗಳು 
ಕೈಬೀಸಿ ಕರೆದಂತಿತ್ತು 
ಕಸು ಮಾಡಲು ಕಾದಂತಿತ್ತು
ತುಟಿ ಬಿರಿಯಲು ಮೂಡಿತೊಂದು ಆತ್ಮವಿಶ್ವಾಸ 
ಕತ್ತಲ ಸರಿಸಿ ಬೆಳಕು ಹರಿಯಿತು
ಅಪ್ಪಿಕೊಂಡ ಕನಸ ಖಜಾನೆ ಭದ್ರವಾಯಿತು.



ಜನವರಿ 31, 2012

ಹನಿಗಳು...

೧. ಮಾಗಿಯ ಮುಂಜಾವಲಿ
    ದೃಡವಾಗಿ ನಿಂತಿರುವ ನಿನ್ನನ್ನು
    ನೇಸರ ಮುತ್ತಿಕ್ಕುವ ಮುನ್ನ
    ಬಳ್ಳಿಯಾಗಿ ನಾ ತಬ್ಬಬೇಕಿದೆ

೨. ಮನಸ ದುಮ್ಮಾನವನ್ನೆಲ್ಲಾ
    ನಿನ್ನೆದುರು ಹರವಿ
    ಹಗುರಾಗಿಸಿಕ್ಕೊಳ್ಳೊಣವೆಂದರೆ
    ಆಮೇಲೆ ತಿಳಿದಿದ್ದು
    ನೀ ಮನದ- ಕುರುಡನೆಂದು

೩. ನೀ ಬೆನ್ನು ಮಾಡಿ ಹೋದಾಗ
    ನಾ ಕಾದಿದ್ದೆ, ಪ್ರಬುದ್ಧತೆಯೊಂದಿಗೆ
    ಮರಳುವಿಯೆಂದು
    ನನಗಾಗ ತಿಳಿದಿರಲಿಲ್ಲ
    ನೀ ಬಂಧನವ ಕಳಚಿಟ್ಟು
    ಹೊರ ನಡೆದಿದ್ದೆಂದು

 
೪. ನಿನ್ನ ಕಲ್ಲೆದೆ ಕರಗಲೆಂದು
      ಮತ್ತೆ ಮತ್ತೆ ಬಡಿದೆ
      ನೀ ಕರಗಲಿಲ್ಲ
      ಒಡೆದು ಹೋದೆ...!


೫. ನಿನ್ನ ಮೌನಕ್ಕೊಂದಿಷ್ಟು
     .....ನೀಡಿ ಸಾಯಿಸು
    ನಾ ನಿನ್ನ ಸಂಗಕ್ಕೆ
    ನೇಣು ಬಿಗಿಯುವ ಮುನ್ನ...!!

 



ಜನವರಿ 18, 2012

ಹೆಂಗಸು..


ಹರಿದಿದ್ದು ಬೆವರೋ ರಕ್ತವೋ ಅಸ್ಪಷ್ಟ 
ಕದಡಿದಷ್ಟು  ಕೆಸರು ಹೂಳಿಸಿಕ್ಕೋಳ್ಳುತ್ತಿತ್ತು
ದಣಿವರಿಯದ ಮೈಗೆ ರಾತ್ರಿ-ಹಗಲೆರಡರಲ್ಲಿ ಕೆಲಸ
ಚಿಂದಿಯಾದ ಬದುಕಿನ ಶ್ರಮಕ್ಕೆ 
ಸಿಕ್ಕಷ್ಟೇ ಕಾಸು

ಎದೆಯೊಳಗಿನ ಬವಣೆಗಳ ಬಿಸಿ-ಬಿಸುಪಲ್ಲಿ
ಕಾವಾರಿಸಿಕೊಂಡವರೇ ಎಲ್ಲಾ
ಯೌವನಕ್ಕೆ  ದಯೆಯಿಲ್ಲ ಮಗನೇ,ಗಡುಸಾಗುತ್ತದೆ
ಮೈ ಬಗ್ಗಿಸಿದಷ್ಟು ಹೊಳಪೇರುತ್ತದೆ

ಎಲ್ಲರೊಳು ಮೀಗಿ, ಜತನವಾಗಿ
ಸೆರಗ ತುದಿಯಲ್ಲಿ ಕಾಸು ಮಡಚಿ ಕೂಡಿಟ್ಟಿದ್ದೆನೆ 
ಬಯಲ ಹೆಂಗಸೆಂಬುದೊಂದು  ಬಲೆ
ಬಲೆಯೊಳಗೆ  ಬಿದ್ದಮೇಲೆ ನೆಲೆಯಿಲ್ಲ, ಬೆಲೆಯಿಲ್ಲ 

ಯಾರಿಗೆ ಅದೇನೇನೋ ನಾನಾಗಿದ್ದರೂ 
ಕಂದಾ..ನಾ ನಿನ್ನ ಅಮ್ಮನೇ...