ಡಿಸೆಂಬರ್ 24, 2014

ಹನಿ ಹನಿ ಇಬ್ಬನಿ...!

1.ಬೆಳಂದಿಗಳ ತಂಪು ರಾತ್ರಿ
ಹುಡುಗಿ ಬೆಚ್ಚಗಿನ ಕನಸು ಹೆಣೆಯುತ್ತಿದ್ದಳು
ಒಳಗಿನ ಕೋಣೆಯ ಹುಡುಗಾ
ಧಗಧಗ ಉರಿಯುತ್ತಿದ್ದ..!

2.ನಿನ್ನಿಂದ ನಿರಾಕರಿಸಲ್ಪಟ್ಟ ಪ್ರೇಮ
ಮತ್ತು
ನನ್ನಿಂದ ನಿರಾಕರಿಸಲ್ಪಡುವ ನೋವುಗಳದ್ದು
ಒಂದೇ ತೂಕ..!

3. ಅವ
ಬೆಟ್ಟದ ತುದಿಯಲ್ಲಿ
ನನ್ನ ನೆನೆದನಂತೆ
ನನಗಿಲ್ಲಿ ಥಂಡಿ -ಜ್ವರ -ನೆಗಡಿ -ಕೆಮ್ಮು !

4. ಬಾಂಬ್ರರ ಮನೆಹುಡುಗನಿಗೆ
ಸಸ್ಯಹಾರದ ಪಾಠ ನಡೆಯುತ್ತಿತ್ತು
ಬೇಲಿಯಾಚೆ ಕಣ್ಣು ನೆಟ್ಟಿದ್ದ ಅವ
ಹೊಲತಿಯ ಬೆತ್ತಲಾಗಿಸುತ್ತಿದ್ದ!

5. ಒಂಟಿ ಮರದ ಗೆದ್ದಲ ಕೊಂಬೆಗೆ
ಹಕ್ಕಿ ಗೂಡು ಕಟ್ಟಲಿ
ನಾ ಚಿಲಿಪಿಲಿ ಕೇಳುತ್ತೇನೆಂಬ
ಹುಚ್ಚುಚ್ಚು ಹಂಬಲ!



ಡಿಸೆಂಬರ್ 6, 2014

ಹನಿ ಹನಿ ಇಬ್ಬನಿ..!

1. ಬೆಳದಿಂಗಳಿಗೆ
ಮೈಚೆಲ್ಲಿ ಮಲಗಿದ್ದ ಅವಳನ್ನು
ಅನಾಮತ್ತು ಎತ್ತಿಕೊಂಡು
ಒಳಗೆ ಹೋದ ಅವನಿಗಿದ್ದಿದ್ದು
ಚಂದ್ರನ ಮೇಲೆ ಮತ್ಸರವಾ..?

2. ಹುಡುಗಾ...!
ಭೌತಶಾಸ್ತ್ರದಲ್ಲಷ್ಟೇ
ವಿದ್ಯುತ್ ಪ್ರವಹಿಸುವುದು ಎಂದುಕೊಂಡಿದ್ದೆ.
ನೀನೊಮ್ಮೆ ಸ್ಪರ್ಶಿಸಿದ ಮೇಲಷ್ಟೇ
ಜೀವವಿಜ್ಞಾನದಲ್ಲೂ ವಿದ್ಯುತ್ ಪ್ರವಹನವಿರುವ
ಸಂಗತಿ ತಿಳಿದದ್ದು.

3. ಅನೈತಿಕ ಸಂಬಂಧವೆಂದರೆ

ಬರಗೆಟ್ಟ ಬರಗಾಲದ ದಿನಗಳಲಿ
ಮಳೆಗೆ ಹೊಂಚು ಹಾಕಿ
ಕೂತ ಇಳೆಯೊಡಲ ಬೆಂಕಿ
ಷವರಿನಡಿಯಲ್ಲಿ ನಿಂತು
ಧಗೆ ತೀರಿಸಿಕೊಳ್ಳುವುದು ಅಷ್ಟೇ!

4. ನೀ ಕೊಟ್ಟ
ಯಾವುದನ್ನೂ ನಾ ಹಿಂದಿರುಗಿಸಿಲ್ಲ
ಪ್ರೀತಿಯನ್ನೂ ..!?
ಅದಕ್ಕೆ ನನ್ನೊಡಲಿಗೆ
ನೋವು ಸುರಿದು ಹೋಗಿ ಬಿಟ್ಟೆಯಾ?

5.ಪ್ರೇಮದೊಡಲ ಸೇರೋ ತವಕಕ್ಕೆ
ಒಂದೇ ಉಸಿರಿನಲ್ಲಿ

ಧಾವಿಸಿ ಬಂದು

ಶರಧಿಯೊಳಗೆ ಲೀನವಾದ

ನದಿಗೀಗ ಅಸ್ವಿತ್ವದ ಹಂಗಿಲ್ಲ


ಆಗಸ್ಟ್ 19, 2014

ಹನಿ ಹನಿ ಇಬ್ಬನಿ..

1.ಕೋಪವೂ ನಿಷ್ಕ್ರೀಯ
ಅಸಹಾಯಕತೆಯ
ಮಡಿಲಲ್ಲಿ...!

2. ಒಲವ ಘಾಸಿಗಳನ್ನು
ಸೈರಿಸಿಕೊಳ್ಳಲೇಬೇಕು
ಬದುಕು ಒಲವಿಗಿಂತ
ತೀವ್ರವಾಗಿರುತ್ತದೆ..!


3. ಉಳಿಸಿಕೊಳ್ಳಬೇಕಾದರೆ
ಕಳೆದೊಮ್ಮೆ ಗೊತ್ತಿರಬೇಕು
ಅದು ಬಲವೇ ಆದರೂ
ಒಲವೇ ಆದರೂ...!
 
4.ಗೆಲುವಿನೂರಿಗೆ
ಪಯಣವಿಟ್ಟ ಮೊದಲದಿನ
ಹೀನಾಯ ಸೋಲನ್ನ ಅಪ್ಪಿದ್ದೆ
-ಒಪ್ಪಿದ್ದೆ..!


5. ನೀ ನನ್ನೊಳಗೆ
ಹನಿಯುವುದು ಬೇಡಿತ್ತು
ಒಣ ಬಂಜರಾಗಿಯೇ
ಇದ್ದುಬಿಡುತ್ತಿದ್ದೆ -ಮೊದಲಿನಂತೆ.
ಹನಿದು ದೂರವಾಗಿದ್ದಿಯಾ
ದಾಹ ಶುರುವಾಗಿದೆ!
 
6.ಎಲ್ಲೊ ಓದಿದ್ದೆ
ಸೋತವನು ಗೆಲ್ಲಬಲ್ಲ
ನೆನಪಾಯಿತು
-ನಾನು ಸೋತಿದ್ದೇ ಒಲವಲ್ಲಿ!
 
7. ಕಬ್ಬಿನ ಬಗ್ಗೆ
ಕವಿತೆ ಬರೆದ ಕವಿಯ
ಮೆಚ್ಚಿದಳು.
ಅವ ರಸಹೀರಿ ಕಳಿಸಿದ!
 
8.ಇರುಳ ಹೆಜ್ಜೆಯ 
ಭರಿಸಲು
ಬೆಳಕೇ ಬೇಕಿಲ್ಲಾ
ಅಂತರಾತ್ಮದ ಕಿಡಿಯೂ ಸಾಕು!
 
9. ಒಡಲಲ್ಲಿ ಕೆಂಡ ಕಟ್ಟಿಕೊಂಡು
ಓಡಾಡುತ್ತಿದ್ದೇನೆ
ಪಾಪಾ..!
ತುಟಿಗದು ಗೊತ್ತಿಲ್ಲಾ...
 
10. ಮನದಂಗಳದ
ಕಣ್ಣೀರಹೊಳೆ ಹೆಪ್ಪುಗಟ್ಟಿ
ಕೂತಿರಬೇಕಾದರೆ
ಬಿರಿದ ತುಟಿಯಲ್ಲಿ
ಆತ್ಮನಿಲ್ಲ.. ! 
 


ಆಗಸ್ಟ್ 6, 2014

ಹನಿ ಹನಿ ಇಬ್ಬನಿ...!

1. ನೀ ತಿಳಿನೀರ ಕೊಳವೆಂದ
ಹೃದಯದಲ್ಲಿ ಪ್ರತಿಫಲಿಸಿದ
ಅವನ ಬಿಂಬ ತೋರಿಸಿದೆ!

 
2. ಮಳೆಯಾಗಿದೆ
ಕನಸಿನಾಗಸದ ಕಪ್ಪು
ತಿಳಿಯಾಗಿದೆ.. !

3. ಮೌನದಿಂದ
ನೋವು ಸಂಭವಿಸುವುದಾರೆ
ನಾನು ಮಾತು.
ಮಾತಿನಿಂದಾದರೆ
ನಾ ಮೌನಿ..!

4. ಹಗಲ ಹಾದಿ ತುಳಿದವರಿಗೆ
ಇರುಳೆಂದರೆ ಕುರುಡು..
ಇರುಳಲ್ಲಿ ತೆವಳಿ
ಹಗಲು ದಕ್ಕಿಸಿಕೊಂಡವರಿಗೆ
ಇರುಳು - ಹಗಲೂ ಬೆಳಕೇ!


5.
ಬದುಕ ಕಾರ್ಗತ್ತಲನ್ನೂ
ಪ್ರೀತಿಸಬೇಕು
ಬೆಳಕಿನ ದಾರಿ
ಕಂಡುಕೊಳ್ಳಬೇಕಾಗಿರುವುದು
ಅಂಧಕಾರದಲ್ಲೇ..!


6.
ಬೆಳಕಿಗೆ ನಡೆದ ದಾರಿಗೆ
ಕತ್ತಲಲ್ಲಿ ಉರುಳಿದ
ಕಂಬನಿಗಳ ಸಾಕ್ಷಿ..!


7.
ನೋವನಾಲಿಸುವ ಹೃದಯ
ಮಿಡಿತ ನಿಲ್ಲಿಸಿದಾಗ
ನೋವುಂಡ ಒಡಲು
ಮಾತ ನಿಲ್ಲಿಸುತ್ತದೆ..!

8.
ಅವನೊಬ್ಬ ಅವಳ
ಹಸಿ ಹಸಿ ತಿಂದು ಬಿಟ್ಟಿದ್ದ
ನೆತ್ತರ ಕುಡಿವ ಹಸಿ ಬಯಕೆ
ಅವಳಿಗೆ ಶುರುವಾಗಿಬಿಟ್ಟಿತ್ತು.

 
9. ನೀ ನನ್ನೆಲ್ಲಾ
ನೋವುಗಳಿಗೆ ಪರಿಹಾರ
ಆಗಲೆಬೇಕೆಂದೆನಿಲ್ಲಾ
ಸಮಾಧಾನವಾಗು
-atleast..!
 
10.ಬಳಸಿಕೊಳ್ಳುವ
ಹಕ್ಕಿಲ್ಲ
ಒಲಿಸಿಕೊಳ್ಳದ ವಿನಃ. 

ಮೇ 28, 2014

ಹನಿ ಹನಿ ಇಬ್ಬನಿ...

1. ಸಂತೋಷವಾಗಿ ಇರುವುದುದಕ್ಕೂ
ಇದ್ದ ಹಾಗಿರುವುದಕ್ಕೂ ವ್ಯತ್ಯಾಸವಿದೆ
ನಗುವುದಕ್ಕೂ
ನಕ್ಕ ಹಾಗೆ ಇರುವುದಕ್ಕೂ ಇದ್ದಂತೆ..!


2.
ಬಾಯ್ತುಂಬಾ ನಗುವ
ನಗೆಯಲ್ಲಿ
ಮನದ ಗೈರು ಹಾಜರಿ


3.
ನನ್ನ ವಿರುದ್ಧ ಜಗತ್ತೇ
ತಿರುಗಿ ನಿಂತಿದೆ
ಜಗತ್ತಿನ ವಿರುದ್ಧ
ಅವ ಸೆಟೆದು ನಿಂತಿದ್ದಾನೆ.. !


4. ಭಾವಗಳು ಬದುಕಿನ
ಉಸಿರೆಂದೆ
ಹೊಟ್ಟೆ ಚುರ್ ಎಂದಿತು!

5. ಬದುಕಿನ ಬಣ್ಣಗಳೇ
ಈ ಹನಿಗಳು ಎಂದೇ..
ಹನಿ ಕಣ್ಣಿನದ್ದಾ..? ಇಬ್ಬನಿಯದ್ದಾ..?
ಪ್ರಶ್ನಿಸಿದ..!

6.ಆತನಿಗೆ ಮದುವೆಯಾಗಿರಲಿಲ್ಲ
ಓಹ್..! ಬ್ರಹ್ಮಚಾರಿಯೋ
ಎಂದೆ..
ಅಲ್ಲಾ...
ಅವಿವಾಹಿತನೆಂದ..!


7.
ಕಣ್ಣು ಹೊಡೆದು
ನಿನ್ನಾಳಕ್ಕೆ ಇಳಿಯಬೇಕೆಂದವನಿಗೆ
ಕಣ್ಣೀನಾಳಕ್ಕಾ ಎಂದು ಕೇಳಿ
ರೆಪ್ಪೆ ಬಡಿದೆ ....!

 
8. ಅವಳ ಕುರಿತು
ಹೊಟ್ಟೆಯೊಳಗೆ
ತಣ್ಣನೆಯ ಕಿಚ್ಚು ಅಂದೇ
ಐಸ್ ಇಡಲಾ ಅಂದ..!

 
9. ಮಳೆಹನಿಯಂತಹ
ತಂಪು ಇನಿಯಾ
ಒಂದು ಹೆಜ್ಜೆ ಹಿಂದೆ ಸರಿದಿದ್ದಾನೆ...!
ಇಳೆಯ ಒಡಲಲ್ಲಿ
ಘೋರ ಬಿಸಿಲ ಬಿರಿಕಿನ
ಮುನ್ಸೂಚನೆ.
 
10. ಕಪ್ಪು ಬಿಳುಪಿನ
ಹುಣ್ಣಿಮೆಯಂತಹ
ಅವನ ಕಂಗಳಲ್ಲಿ
ಬಾಳ ರಂಗಿನ ಬೆಳಗು.. !
 

ಏಪ್ರಿಲ್ 26, 2014

ಹನಿ ಹನಿ ಇಬ್ಬನಿ..

1. ಹುಡುಗಿಯರು ಹಾಗೆಲ್ಲಾ
ಒಲಿಯುವುದಿಲ್ಲಾ..
ನೀವಾಗೇ ಸಿಕ್ಕುಬಿಡಿ ಹೂವುಗಳೇ
ಅವರೇ ದಕ್ಕಿಸಿಕೊಳ್ಳುವ ಮುನ್ನ
ಕೊನೆಪಕ್ಷ ಉಸಿರುಳಿದಿರುತ್ತದೆ
ಸೇಡು ತೀರಿಸಲೋಸುಗವಾದರೂ..!

 
2. ಅಮ್ಮಾ...!
ಪ್ರೀತಿಯ ಒಡಲು 
ಮಮತೆಯ ಕಡಲು

3. ಸೋತು ತಳ ಹಿಡಿದಾಗಿದೆ
ಇನ್ನೇನಾದರೂ ಘಟಿಸಿದರೆ
ಅದು ಗೆಲುವೇ
ಅಂದುಕೊಳ್ಳುವಾಗ
ಪಾತಾಳದ ಅರಿವಿರಲಿಲ್ಲ ನನಗೆ!
 
4. ಅಪ್ಪ ಜಾಲಿ ಮನುಷ್ಯ
-ಕುಡಿದಾಗ
ಪುಟ್ಟ ಮಣ್ಣಿನ ಮಡಕೆ ಒಡೆದು
ಕೂಡಿಸಿಟ್ಟ ಚಿಲ್ಲರೆ ಕೊಟ್ಟಳು
ಅಪ್ಪ ನಕ್ಕ.. ಮಗಳೂ ..!


5.
ಒಳಗೆ ಸುಡುವ ಬೆಂಕಿಗೆ 
ಕಣ್ಣಿನ ನೀರು ಸುರಿದು 
ಒಡಲ ಬೇಗುದಿಯ ನೀಗಿಸಲು 
ಪ್ರಯತ್ನಿಸುತ್ತದೆ.. 
ಹೌದು.. ಕಣ್ಣೀರಿಗೆ ಕರುಣೆಯಿದೆ !
 
 

ಏಪ್ರಿಲ್ 22, 2014

ಹನಿ ಹನಿ ಇಬ್ಬನಿ..

1. ಅವನು ತನ್ನ ಜೀವನ
ತೆರೆದ ಪುಸ್ತಕ ಎನ್ನುತ್ತಿದ್ದ .
ನಾನೋ ಓದು ತಿಳಿಯದ
ಅನಕ್ಷರಸ್ಥೆ ..!

2. ಸದಾ ನನ್ನನ್ಯೂನತೆಗಳಿಂದ
ಕೊರಗುವ ಬಡಿದಾಡುವ
ಅವನನ್ನು ನೆನೆವಾಗ
ದೂರವಿದ್ದು ದೇವರಾಗಿದ್ದ ದಿನಗಳ ನೆನಪು
ಕಣ್ಣಿಂದ ಜಾರುತ್ತದೆ...!
Feeling: ಕೆಲವೊಮ್ಮೆ ಹತ್ತಿರವೂ ಅಂತರ ಸೃಷ್ಟಿಸುತ್ತದೆ

3. ಒಬ್ಬರಿಂದೊಬ್ಬರು ದೂರವಿರುವುದನ್ನು 
ಅಂತರವೆನ್ನುತ್ತಿದ್ದರು
ಜೊತೆಯಿದ್ದೇವೆ  - ಉಸಿರಿಲ್ಲದ ನಾವೆಯಲ್ಲಿ 
ದೂರದ ಅರ್ಥ ಹತ್ತಿರವಾಗಿದೆ!

4. ನನಗೆ ಗಂಡು ಮಕ್ಕಳ ಸ್ನೇಹ 

ಅವನಿಗೆ ಹೆಣ್ಣು ಮಕ್ಕಳದು 
ಅದಕ್ಕೆ ನಮ್ಮಿಬ್ಬರದು 
'ಮೇಡ್ ಫಾರ್ ಈಚ್ ಅದರ್' ಜೋಡಿ 
ಅವನು ಹೆಣ್ಮನ ಬಲ್ಲ 
ನಾ ಗಂಡು ಹೃದಯ ಬಲ್ಲೆ ..!

5. ಬದುಕಿನ ಕರಾಳ ಕಪ್ಪನ್ನು 
ಅಡಗಿಸಬೇಕೆಂದರೆ 
ಮೇಕಪ್ ಅನಿವಾರ್ಯ 
ಎಂದಳಾಕೆ...!!


ಏಪ್ರಿಲ್ 9, 2014

ಹನಿ ಹನಿ ಇಬ್ಬನಿ..

1. ಸಾಲು ಸಾಲು ಸೋಲುಗಳು
ಮಡಿಲೊಳಗೆ ಬಿದ್ದಾಗ
ಬದುಕುವ ಛಲಕ್ಕೆ
ಹುಟ್ಟಿನ ಸಂಭ್ರಮ..!


2. ನೀಳಜಡೆಯ ಹುಡುಗಿಯ
ಕನವರಿಕೆಯಲ್ಲಿ
ಇದ್ದವನಿಗೆ ಸಿಕ್ಕಿದ್ದು
ಮೋಟು ಜಡೆಯ ಬೆಡಗಿ..!


3.
ಮನವಿತ್ತು
ತಿಳಿಕೊಳದಂತೆ
ಕದಡಿದ್ದಾರೆ
ಕಡಲಂತಾಗಿದೆ...!
ಹಂಬಲ: ಮತ್ತೆ ಕೊಳವಾಗಬೇಕು.. ತಿಳಿಯಾಗಬೇಕು.

4. ನಿನ್ನೆತ್ತರ ಮುಟ್ಟುವ
ಹಂಬಲಕ್ಕೆ ಬಿದ್ದು
ತುದಿಗಾಲಲ್ಲಿ ನಿಂತಿದ್ದೇನೆ ಹುಡುಗಾ!
ಏಟುಕಿಬಿಡು ಅರೆಗಳಿಗೆ
ಈ ಕರಗಳಿಗೊಮ್ಮೆ ..!
 
5. ಗಾಢ ಕತ್ತಲು ತಬ್ಬಿಕೊಂಡಿದೆ
ಉಸಿರುಗಟ್ಟಿಸುವ ಆತುರದಲ್ಲಿ.
ಜೀವ ಹೋಗುವ ಮುನ್ನ
ನಿನ್ನನ್ನೊಮ್ಮೆ ನೋಡಬೇಕು
ಹನಿ ಕಿರಣವೇ..!




ಮಾರ್ಚ್ 24, 2014

ಹನಿ ಹನಿ ಇಬ್ಬನಿ

1. ಅವಳ
ಮೌನದ ಅಂತರಾಳ
ಹುಡುಕ ಹೊರಟವನ
ಕಣ್ಣಲ್ಲಿ ಬೆಳಗು-ಬೆರಗೂ..!

2. ಕೆನ್ನೆಗೆ ಮುತ್ತಿಡುವ
ಮುಂಗುರುಳು
ನನ್ನವನ
ಪ್ರತಿಸ್ಪರ್ಧಿ..!
 
3. ನಿನ್ನೊಲವ ಕಂಗಳು
ಆಗೀಗ್ಗೆ ದಿಟ್ಟಿಸುವಾಗ
ಹೂತು ಹಾಕಿದ ನೆನಪುಗಳೂ
ಎದ್ದು ಕೂರುತ್ತದೆ
ಪ್ರೇಮದ ಪಳೆಯುಳಿಕೆಯಂತೆ. 
 
4. ಅವನ ಬಜಾರಿ ಹುಡುಗಿಯ
ಮೌನವೂ ಎದೆ ತಾಕುತ್ತದೆ
ಅವಳ ಒಲವ ಕಂಗಳ ದಿಟ್ಟಿಸಿದಾಗ
ಮುಂಗುರಳ ಸದ್ದಿಗೆ ಕಿವಿಯಾದಾಗ.. !
 
5. ಕಂಗಳ ಓದಿ
ಅಕ್ಷರದ ದೀಪ
ಹಿಡಿಯಬಲ್ಲೆಯಾದರೆ
ಬದುಕು ಬೆಳಗುವ ಕ್ರಿಯೆ ನಿನಗೆ
ಅಸಾಧ್ಯವಲ್ಲ ಬಿಡು.. !
 
6. ಭೋರ್ಗರೆದು ಸುರಿವ
ಹುಡುಗನಿಗಿಂತ
ಒಲವ ತುಂತುರು ಹರಿಸುವ
ಸೋನೆ ಹುಡುಗ ಇಷ್ಟವೆನಗೆ.

7. ಅಮರತ್ವ ದಕ್ಕಿದರೆ
ಪ್ರೇಮದ ಉತ್ಕಟತೆ
ಕನಸಾಗಿ ಬಿಡುತ್ತಿತ್ತೇನೋ

8. ಮುಖಪುಸ್ತಕದ
ಸಂದೇಶಗಳ
ಸ್ಮೈಲಿಗಳಲ್ಲಿ
ಜೀವಂತವಿಲ್ಲದ ನಗು...!
 
9. ಅವನ ತೆರೆದ ಬಾಹುಗಳಲ್ಲಿ
ಹುದುಗಿಕೊಳ್ಳುವಾಗ
ಸುಡು ವಿರಹದ
ಘೋರ ಅಂತ್ಯ..
 
10.ವಿರಹದ ನೋವು
ಭರಿಸಲಾರದ ಅವನು
ಮತ್ತೆ ತನ್ನವಳ ಸೇರಿದ್ದು
ಕರು ತಾಯಿಯ ಮಡಿಲಿಗೆ
ಮರಳಿದಂತೆ..

 

ಮಾರ್ಚ್ 13, 2014

ಹನಿ ಹನಿ ಇಬ್ಬನಿ..

1.  ಏಕಾಂತವೆನ್ನುವುದು
ಆತ್ಮದೊಂದಿಗಿನ ಸಾಂಗತ್ಯ
ಅಲ್ಲಿ ಬೆಳಕಿದೆ
ಏಕಾಂಗಿಯೆಂದರೆ
ಇದ್ದೂ ಇಲ್ಲವಾದ ಒಂಟಿತನ
ಸವೆದ ದಾರಿಯಲ್ಲಿ
ಪಡಿ ಮೂಡದ ಹೆಜ್ಜೆಗಳು

2. ನಡು ರಾತ್ರಿಯ ಕತ್ತಲಲ್ಲಿ
ಕದಲದ ಹೆಜ್ಜೆಗಳು
ಎದೆಯೊಳಗೆ ಮಿಂಚು ಹುಳುವಿನ
ಸುಳುಹೂ ಇಲ್ಲ
ದಿಕ್ಕು ತೋಚದವಳಂತೆ ಕುಳಿತು ಬಿಟ್ಟಿದ್ದೇನೆ
ಒಳಗೆ ಕತ್ತಲೆಂದರೆ ಬರೀ ಕತ್ತಲು 


3. ಇಂಥವರೊಂದಿಗೆ ಏಗಲಾರೆ
ಎಂದವರೂ
ನೀಗಲಾರದ ಕೊರತೆಗಳಿಗೆ
ಶರಣಾಗಿದ್ದಾರೆ.
ಏಗುತ್ತಿದ್ದಾರೆ.


4. ಮಗಳಿಗೆ

ಅರ್ಬುದ ರೋಗವೆಂದು
ಕಣ್ಣೀರಿಟ್ಟವ
-ವೈದ್ಯ..!

5.  ಯುದ್ಧವಿಲ್ಲದೆ ಪಂದ್ಯ
ಗೆಲ್ಲುವುದೆಂದರೆ
ಕುಂತಿಯ ಮಕ್ಕಳಿಗೆ
ಪಾಂಡು ಅಪ್ಪನಾದಂತೆ.



ಮಾರ್ಚ್ 6, 2014

ಬೆಳಕು ಹರಿವುದು ಬೇಡ.. !

ಬೆಳಕು ಹರಿವುದು ಬೇಡ.. !
ಕತ್ತಲಲ್ಲಿ ಕೂತ ಹೆಣ್ಣು
ಚಡಪಡಿಸುತ್ತಾಳೆ
ಬೆಳಕಿನ ಮುಖವಾಡದಲ್ಲಿ
ಮೈಮೇಲೆ ಹರಿದಾಡುವ
ನೂರು ಕಣ್ಣುಗಳಿಗಿಂತ
ತನ್ನ ತಾನೇ ನೋಡಿಕೊಳ್ಳಲಾಗದ
ಕಾರಿರುಳೇ ಹಿತವೆನಗೆ. 

ಬೆಳಕು ಹರಿವುದು ಬೇಡ..!
ಸೋತ ಹೆಣ್ಣು ಹುಲುಬುತ್ತಾಳೆ
ತಾಳಿ ಭಾಗ್ಯವನ್ನೇ ಗೆಲ್ಲಲಾರದೆ
ಸವತಿಯೊಂದಿಗೆ ಸೆಣಸಾಡಿ
ಸೋತು ಸವೆದ ಬದುಕಿನ ಮುಖವನ್ನು
ತೋರಲಾರದವಳಿಗೆ
ಜಗದ ಬೆಳಕು ಬೇಕಿಲ್ಲವಂತೆ 

ಬೆಳಕು ಹರಿವುದು ಬೇಡ.... !
ಒಂಟಿ ಹೆಣ್ಣು ಬೇಡುತ್ತಾಳೆ
ಕತ್ತಲೆಗೆ ಕಟ್ಟಳೆಯಿಲ್ಲಾ
ಬೆಳಕಿನ ಬಣ್ಣಗಳಿಗೆ
ಬದುಕಿನ ಕತ್ತಲ ನೀಗಿಸೋ ದರ್ದಿಲ್ಲ.
ಇರುಳೆಂದರೆ ಒಂಟಿ ಮನಕ್ಕೆ ಆತ್ಮನ
ಪರಿಚಯವಾಗುವ ಹೊತ್ತು 
ಬೆಳಕು ಹರಿವುದು ಬೇಡ!
 
ಒಂದರ್ಥದ ಬೆಳಕಿನ ಭಯದಲ್ಲಿ
ಅವಳಂಥವರ ಮನ ಚೀರುತ್ತದೆ.
-ಬೆಳಕು ಹರಿವುದು ಬೇಡ!
 

(ಯಾವುದೋ ಬೇಸರಕ್ಕೆ ಕತ್ತಲಿಗೆ ಮುಖ ಮಾಡಿ ಕುಳಿತ ಸಂದರ್ಭದಲ್ಲಿ, ಬೆಳಗಾಗದಿರಲಿ ಎಂಬ ಹುಚ್ಚು ಯೋಚನೆಯಲ್ಲಿ ಮೊಬೈಲ್ ಟೈಪಿಸಿದ ಸಾಲುಗಳು ಇವು ...ಇಷ್ಟವಾದರೂ ಆಗಿಲ್ಲವಾದರೂ ಹೇಳಿ..... )

ಫೆಬ್ರವರಿ 24, 2014

ಒಡಲಾಳದ ಒಳಗುಟ್ಟು..!

ನೆನಕೆಗೂ ಹೆದರುವ
ನೆನಪುಗಳೇ ತೆಕ್ಕೆಗೆ ಬೀಳಲು ತವಕಿಸುವುದು
ದೂರ ತಳ್ಳಿದಷ್ಟೂ
ಹೆಗಲಿಗೆ ಜೋತು ಬೀಳುತ್ತವೆ
ಓಡಿ ಹೋದಷ್ಟೂ
ಅಟ್ಟಿಸಿಕೊಂಡು ಬೆನ್ನು ಹತ್ತುತ್ತವೆ. 

ಒಡಲಾಳದ ಒಳಗುಟ್ಟುಗಳೇ ಹಾಗೆ.. !
ಬೇಡವೆಂದಾಗ ಉಸಿರ ಹತ್ತಿರ ಹತ್ತಿರ
ರಾತ್ರಿಯ ಕನಸುಗಳಲ್ಲಿ ಬೆಚ್ಚಿಬೀಳುವಾಗ
ಧೈನ್ಯವಾಗಿ ಬೇಡಿಕೊಳ್ಳುತ್ತೇನೆ
ದೂರವಿರು...!
ಕುಣಿದು ಕುಪ್ಪಳಿಸಿ ಬಳಿ ಬರುತ್ತವೆ
ಒಲ್ಲದ ಗಂಡನ ಅಪ್ಪುಗೆಯ ಹಾಗೆ..!

ಒಳಗುಟ್ಟುಗಳಲ್ಲಿ ಕರುಳು ಕೊರೆವ ಯಾತನೆ
ಹುಟ್ಟಿಸಿ, ಬದುಕಿಸಲಾಗದ
ಭಗ್ನ ಕನಸುಗಳ ಅವಶೇಷಗಳಲ್ಲಿ ನಲುಗುವುದಕ್ಕಿಂತ
ಅವುಗಳು ದುಃಸ್ವಪ್ನಗಳಾಗಿ ಕಾಡುವುದಕ್ಕಿಂತ
ಬಂಜೆಯಾಗಿದ್ದರೇ ಸೈಯಿತ್ತು
ತೀವ್ರತೆಯ ತುತ್ತತುದಿ!

ಸಾಂತ್ವನದ ಕಣ್ಣ ಕೊನೆಯಲ್ಲೂ ಕೊಸರುವ ನೀರು
ತಾಯಿ ಹೆದರಬಾರದು
ತನ್ನದೇ ಕುಡಿಗಳ ನೆರಳಿಗೆ
ಒಡಲಾಳದ ಒಳಸುಳಿಗಳ
ನೆರಳನ್ನು ಬರಸೆಳೆದುಕೊಂಡರೆ
ಮಗು ಮರಳೀತು ತಾಯ ಮಡಿಲಿಗೆ
ಪ್ರೀತಿಯಿಂದ... !

ಫೆಬ್ರವರಿ 19, 2014

ಹನಿ ಹನಿ ಇಬ್ಬನಿ..

1. ಗೆಳತಿ ಹೇಳುತ್ತಾಳೆ
ನನ್ನಲ್ಲಿ ಬದಲಾವಣೆಯಾಗಿದೆಯಂತೆ
ಹೌದು!
ಸಹಿಸಿಕೊಳ್ಳುವುದನ್ನು ನಿಲ್ಲಿಸಿದ್ದೇನೆ
ಎಂದಿದ್ದೇನೆ.


2. ಸಂಯಮವೆಂದರೆ
 ದೂರ ದೂರ ಓಡಿ
ಹಸಿವಿಲ್ಲ -ಆಗುವುದಿಲ್ಲ ಎನ್ನುವುದಲ್ಲ

ಊಟದ ಮುಂದೆಯೇ ಕೂತು
ತನ್ನ ತಾ ನಿಗ್ರಹಿಸುವುದು.

3. ಒಡಲಲ್ಲಿ ಅತೃಪ್ತಿಯ ಸೆಳಹು
ಅರೆ ತುಂಬಿದ ಹೊಟ್ಟೆಗೆ
ಹೊಳೆದ ಹಸಿವಿನ ಅರ್ಥ!

ಒಡಲೀಗ ತೃಪ್ತ!
ಹಸಿವು ಗೊತ್ತಿಲ್ಲದೇ ಪಡೆದಿದ್ದಕ್ಕೂ
ಗೊತ್ತಾಗಿ ಪಡೆದಿದ್ದಕ್ಕೂ
ವ್ಯತ್ಯಾಸ ಅಜಗಜಾಂತರ!


4. ನಾನೆಂದರೆ ಕತ್ತಲೇ
ಅಂದಿಗೂ.. ಇಂದಿಗೂ ..
ಆದರೆ ..
ನಿನ್ನಯ ಬೆಳಕು
ನನ್ನ ಬದುಕ ಬೆಳಗಿದೆ
ಹೌದು ...!!
ನಾ ನಿನ್ನ ಶಶೀ
ನೀ ನನ್ನ ರವಿ .


5. ಜನ್ಮಕ್ಕಂಟಿಕೊಂಡ 

ಒಂಟಿತನವ 
ಹೃದಯದೊಳಕ್ಕೆ 
ಇಳಿದೆನೆಂದವರೂ ನೀಗಿಸಲಾರರು..!!

6. ನಸುಗತ್ತಲ ಹೆಜ್ಜೆಯ ಜೊತೆ ನೀನಿದ್ದಾಗ
ನಿನ್ನುಸಿರು ನನ್ನೋಳ ಸೇರಿದಾಗ
ವಿರಹದುರಿ ಆರಿದಾಗ
ಮೌನ ಸಂಜೆಗಳೂ ಮಾತನಾಡುತ್ತವೆ..!
7.ಅಮವಾಸ್ಯೆಯ ಕಾರ್ಗತ್ತಲಲ್ಲೂ
ಚಂದಿರ ಇಣುಕಿದ ಕನಸು ಬಿತ್ತಲ್ಲ ?
ಅಂದೇ ......
ನಾ ಹುಡುಗಿಯಾಗಿದ್ದು
ನೀ ನನ್ನ ಹುಡುಗನಾದದ್ದು ....!


8. ಅಮ್ಮನ ಸೆರಗಿಂದ
ಹಾರಿ ಹೋದ ಹಕ್ಕಿ
ರೆಕ್ಕೆ ಮುರಿದಾಗ
ದೊಪ್ಪನೆ ಬಿದ್ದದ್ದು
ಮೂಕ ಪ್ರೀತಿಯ
ಅವಳ ಮಡಿಲಿಗೇ ...!!


9. ಇರುಳ ಓಡಿಸುವೆನೆಂದು
 ಹಚ್ಚಿಟ್ಟ ಹಣತೆ
ಕುಳಿಗಾಳಿಯೊಂದಿಗೆ
ಲೀನವಾಯಿತು..!


10.
ನನಗೆ ಗೊತ್ತು
ಗೆಲ್ಲುವುದಷ್ಟೇ
ಪರಮ ಗುರಿಯಾಗಿದ್ದಾಗ
ಪೂರ್ಣ ಶರಣಾಗತಿ
ಎಂಬ ಸೋಲನ್ನು ಒಪ್ಪಿಕೊಳ್ಳುವುದೂ..!

ಜನವರಿ 27, 2014

ಹಸಿವೆಯೆಂದರೇ ಹೀಗೆಯಾ?!

ಹಸಿವೆಯೆಂದರೇ ಹೀಗೆಯಾ?
ಬೀದಿಯ ಜನರ ಓಡಾಟದ ಪರಿವೆ ಇಲ್ಲದೇ
ಕೊಳಕು ಸೀರೆಯಲ್ಲಿ ಸುತ್ತಿಕೊಂಡ
ಎಂಜಲನ್ನು ಗಬಗಬನೇ ನುಂಗುವುದು?

ಹಸಿವೆಯೆಂದರೇ ಹೀಗೆಯಾ?
ದುಡಿಯಲು, ಬೇಡಲು ಶಕ್ತಿಯಿಲ್ಲದ ಮುದುಕ
ಕೊಳಕು ಸೀರೆಯ ಹೆಂಗಸಿನ ಸೀರೆಯೋಳಗಣ
ಎಂಜಲ ಕಿತ್ತುಕೊಂಡು ತಾ ತಿನ್ನುವುದು?

ಹಸಿವೆಯೆಂದರೇ ಹೀಗೆಯಾ?
ತನ್ನೆಡೆಗೆ ಕೈಯಿಟ್ಟ
ನಿಶ್ಶಕ್ತ ಮುದುಕನ ಜಾಡಿಸುವುದು
ತಲೆಯೊಡೆದು ರಕ್ತ ಸುರಿಯುವಂತೆ
ಕಲ್ಲು ಹೊಡೆಯುವುದು?

ಹಸಿವೆಯೆಂದರೇ ಹೀಗೆಯಾ?
ತನ್ನ ತೆವಲಿನ ಹೆಂಗಸಿನ
ಸೆರಗು ಮುಟ್ಟಿದ ಮುದುಕನಿಗೆ
ಹರಿದ ಎಕ್ಕಡ ಕೈಗೆತ್ತಿಕೊಳ್ಳುವುದು?

ಹಸಿವೆಯೆಂದರೇ ಹೀಗೆಯಾ?
ಕತ್ತಲಿಗೆ ಕಾಯದೇ ಅರೆ ಸುತ್ತಿಕೊಂಡ ಸೀರೆಯ
ಬೀದಿಯಲ್ಲೇ ಬಿಚ್ಚಿ ಹಸಿದ ಗಂಡಸಿಗೆ
ಕೊಟ್ಟುಕೊಂಡು ಹಸಿವು ನೀಗಿಸಿಕೊಳ್ಳುವುದು?

ಹಸಿವೆಯೆಂದರೇ ಹೀಗೆಯಾ?
ತಲೆಯೊಡೆದು ಸೊರುತ್ತಿರುವ ರಕ್ತದ ಪರಿವಿಲ್ಲದೆ
ಬೀಳುತಿರುವ ಏಟಿನ ಕದಲಿಕೆಯಿಲ್ಲದೇ
ನಿರ್ಲಿಪ್ತವಾಗಿ ಎಂಜಲ ನೆಕ್ಕುತ್ತಿರುವುದು?

ಹಸಿವೆಯೆಂದರೇ ಇದೆಯಾ?!
ಒಂಟಿ ಬದುಕಿನ ಹೋರಾಟ..!
ಜಂಟಿ ಬದುಕಿಗಾಗಿ ಹೋರಾಟ..!

ಪ್ರೇರಣೆ:ಮೆಜೆಸ್ಟಿಕ್ ನ ಸ್ವಪ್ನ ಬುಕ್ ಹೌಸ್ ರೋಡಿನಲ್ಲಿ ಕಂಡ ಘಟನೆ.

ಜನವರಿ 23, 2014

ನಿನ್ನ ಹೊರತಾಗಿ.. !!

ರಾಣಿಯಾಗುವ ಬಯಕೆಯಿಲ್ಲ
ನಿನ್ನ ಹೃದಯ ಸಿಂಹಾಸನವೇ
ನನ್ನದಾಗಿರುವಾಗ

ಸಿರಿ ಸಂಪತ್ತಿನಲ್ಲಿ
ಮೀಯುವ ಆಸೆಯಿಲ್ಲ
ಸುರಿವ ಸೋನೆಯ ಜೊತೆ
ನೀನಿರುವಾಗ

ಜಗತ್ತಿನ ಎಲ್ಲಾ ಸುಖ
ನನ್ನದಾಗಿರಬೇಕೆಂಬ ಮಂಪರಿಲ್ಲ
ಬೇಸರದ ಸಂಜೆಗಳಿಗೆ
ನಿನ್ನ ಹೆಗಲಿರುವಾಗ

ಅನುಕ್ಷಣವೂ ನಿನ್ನ ಸಾಂಗತ್ಯ ಬೇಕಿಲ್ಲ
ಸಂಜೆ ಮಬ್ಬಲ್ಲಿ ಕಿರುಬೆರಳಿಡಿದು
ನೀ ನಡೆಸುವಾಗ

ಸುಂದರನಾದ ಸಂಗಾತಿಯ
ಕನವರಿಕೆ ಕನಸುಗಳಿಲ್ಲ
ಕಡು ಮೈಯ ತಿಳಿ ಮನದ
ನಿನ್ನ ನಾ ಪಡೆದಿರುವಾಗ

ಕಣ್ಣಲ್ಲಿ ಕಣ್ಣಿಟ್ಟು ಕಾಪಾಡುವ
ನಾಯಕನ ಪಡೆವ ಹಂಬಲವಿಲ್ಲ
ಕಣ್ಣಲ್ಲಿ ಕನಸಿಡುವ
ಕನಸುಗಾರ ಜೊತೆಯಿರುವಾಗ

ಸೂರ್ಯಪ್ರಭೆಯೆ ಹೊತ್ತಿಹೆನೆಂಬ
ಹಮ್ಮಿನ ಗಂಡಸಿನ ದಾಹವಿಲ್ಲ
ರಾತ್ರಿಯ ಮಡಿಲಿಗೆ ತಣ್ಣಗಿನ
ಬೆಳದಿಂಗಳ ಸುರಿವ ಚಂದಿರ ನನ್ನೊಳಿರುವಾಗ

ನನ್ನವ ಅಷ್ಟೆಲ್ಲಾ ಆಗಿಬಿಡಬೇಕೆಂಬ
ಸುಳ್ಳು ಕನಸುಗಳಿಲ್ಲ
ಇಷ್ಟೇ ಇಷ್ಟಾಗಿ ಇಷ್ಟವಾಗಿ
ನನ್ನೊಳಗೆ ನೀ ಇಳಿದಿರುವಾಗ..